16 Hydref, fe wnaeth tîm Cynnwys Cleifion a’r Cyhoedd (PPI) Canolfan Ymchwil Canser Cymru (WCRC) gymryd rhan yn Ffair Iechyd Cymunedau Ethnig Leiafrifol (MEC) yn Stadiwm Dinas Caerdydd.
Mae’r digwyddiad blynyddol yn cynnig cyfle i gysylltu cymunedau ethnig leiafrifol â gwasanaethau iechyd ledled Caerdydd, Bro Morgannwg, a’r ardaloedd cyfagos. Thema’r Ffair eleni oedd “Adeiladu Cymunedau Iach: annog hunan-ofal a chyflawni cydraddoldeb iechyd”. Nod y ffair oedd grymuso unigolion i gymryd cyfrifoldeb dros eu hiechyd a meithrin cynwysoldeb o ran cyrchu gwasanaethau gofal iechyd.
Cynhaliodd tîm PPI y Ganolfan sawl gweithgaredd rhyngweithiol i ymgysylltu ag ymwelwyr, gyda’r nod o godi ymwybyddiaeth o ymchwil canser a chynnwys y cyhoedd mewn penderfyniadau gofal iechyd. Ymhlith y gweithgareddau roedd gêm labelu corff anatomegol, cwis ymwybyddiaeth o ganser, a defnyddio pom-poms i gynnal arolwg llawn hwyl er mwyn casglu barn y cyhoedd ar gynnwys cleifion a’r cyhoedd. Roedd yr ymarferion hyn wedi ysgogi trafodaethau ystyrlon gydag ymwelwyr am iechyd, ymchwil feddygol, a rôl cynnwys cymunedau wrth lunio gofal iechyd.
Fe wnaeth Bob McAlister, Partner Ymchwil Cynnwys Cleifion a’r Cyhoedd, ganmol trefn y digwyddiad, a’r nifer a ddaeth iddo: “Roedd yn ddiwrnod da iawn. Gwnaeth y trefnwyr waith mor dda wrth annog cymaint o aelodau o’r gymuned i ddod i’r digwyddiad. Roedd pob un o’r sgyrsiau pwysig ar gynnwys y cyhoedd yn gallu digwydd, yn ogystal ag annog pobl i fanteisio ar yr archwiliadau meddygol ar y safle. Mae cymaint o deuluoedd yn cael eu heffeithio gan ganser, ac fe roddodd hynny gyfle i ni egluro’r hyn y mae’r Ganolfan yn ei wneud ym maes ymchwil clefydau. “
Cytunodd Julie Hepburn, Partner Ymchwil Lleyg Arweiniol, a’i deimladau, gan ddweud bod y ffair yn “wych ac yn ffordd ardderchog o gysylltu ag ystod amrywiol o bobl sydd â diddordeb mewn dysgu rhagor am ymchwil feddygol.”
Fe wnaeth Mererid Evans, Cyfarwyddwr Canolfan Ymchwil Canser Cymru, dynnu sylw at ba mor bwysig oedd hi fod tîm Cynnwys Cleifion a’r Cyhoedd yn cael y cyfle i gymryd rhan. “Mae’r gefnogaeth barhaus y mae’r tîm Cynnwys Cleifion a’r Cyhoedd yn ei rhoi i’r Ganolfan yn hanfodol wrth ein helpu i gysylltu â’r cymunedau rydyn ni’n eu gwasanaethu, gan sicrhau bod ein gwaith yn parhau i fod yn berthnasol ac yn effeithiol.”
Roedd Ffair Iechyd Cymunedau Ethnig Leiafrifol yn ffordd effeithiol o bontio’r bwlch rhwng gwasanaethau gofal iechyd a chymunedau lleiafrifol, annog hunan-ofal, a hyrwyddo cydraddoldeb iechyd yn y rhanbarth. Mae’r Ganolfan yn edrych ymlaen at gymryd rhan eto yn y blynyddoedd i ddod.