Mynd i'r cynnwys

Cefnogi rhagoriaeth ymchwil

Symud ymlaen gyda CReSt

Croeso i Ganolfan Ymchwil Canser Cymru

Mae ymchwil canser yn hanfodol er mwyn canfod y triniaethau gorau ar gyfer pobl â chanser, dod o hyd i ffyrdd i ddiagnosio canser yn gynt, a helpu i’w atal rhag datblygu yn y lle cyntaf.

Yng Nghanolfan Ymchwil Canser Cymru, rydym yn gweithio gyda chleifion canser a phartneriaid eraill i ddatblygu a chyflawni rhagoriaeth ymchwil ledled Cymru. Rydym wedi ein lleoli ym Mhrifysgol Caerdydd ac yn cael ein hariannu gan Ymchwil Iechyd a Gofal Cymru.

Y diweddaraf

Canolfan Ymchwil Canser Cymru yn dod ag ymchwilwyr ynghyd ar gyfer diwrnod rhwydweithio

Canolfan Ymchwil Canser Cymru yn dod ag ymchwilwyr ynghyd ar gyfer diwrnod rhwydweithio

Ar 19 Hydref, croesawodd Canolfan Ymchwil Canser Cymru (WCRC) ymchwilwyr presennol a chyn ymchwilwyr sydd wedi derbyn cyllid gan WCRC i’w Diwrnod Rhwydweithio Ymchwilwyr, sef diwrnod o rannu gwybodaeth, datblygiad proffesiynol a chydweithio ar draws Cymru. Daeth yr ymchwilwyr ynghyd o wahanol gamau yn eu gyrfaoedd i rannu eu gwaith, dysgu am ddatblygiadau ym maes ymchwil canser yng Nghymru a meithrin cysylltiadau â chydweithwyr sy’n gweithio mewn gwahanol feysydd ymchwil. Roedd y rhaglen yn cynnwys cyfres o gyflwyniadau ymchwil byr, yn arddangos ehangder y gwaith a gefnogir gan WCRC. Rhannodd Dr Claire O’Neill o Gyfadran Ymchwil Iechyd a Gofal Cymru gyngor gwerthfawr hefyd ar sut i osgoi peryglon cyffredin wrth wneud cais am gymrodoriaethau a dyfarniadau personol, tra bu Dr Huw Morgan yn myfyrio ar ei daith tuag at yrfa ymchwil annibynnol. Roedd cynnwys y cyhoedd ac ymgysylltu â’r cyhoedd yn ganolog i’r diwrnod, gyda’r cyfranogwyr yn cael cyfle i gwrdd â Phartneriaid Ymchwil Cynnwys y Cyhoedd a Chynnwys Cleifion (PPI) newydd WCRC a chymryd rhan mewn trafodaethau grwpiau bach i archwilio rôl PPI mewn ymchwil canser. Myfyriodd Molly Fenton, Partner Ymchwil Arweiniol Lleyg PPI WCRC, ar bwysigrwydd dod ag ymchwilwyr a phartneriaid cyhoeddus ynghyd wyneb yn wyneb: “Roedd yn ddiwrnod gwych, ac rwy’n hynod falch o’n cynrychiolwyr PPI, Julie, Bob a Carole, a ofynnodd gwestiynau pwysig o safbwynt y cyhoedd a chleifion. Roedd cael cyfle i’w gweld i gyd wyneb yn wyneb yn sicr yn un o uchafbwyntiau’r diwrnod.” Rhoddodd y trafodaethau gyfle i gynrychiolwyr PPI rannu eu safbwyntiau, archwilio profiadau unigol a chynnig arweiniad i ymchwilwyr ar gynnwys cleifion a’r cyhoedd yn eu gwaith. Tynnodd yr adborth o’r diwrnod sylw at werth y cyflwyniadau ymchwil a’r cyfle i gymryd rhan mewn trafodaethau mwy penodol. Dywedodd un cyfranogwr yn y ffurflen adborth ddienw: “Mwynheais glywed am yr holl waith gwych sy’n cael ei wneud – mae’n wirioneddol ysbrydoledig. Roeddwn hefyd yn gwerthfawrogi’r trafodaethau PPI o amgylch byrddau bach yn fawr, gan eu bod yn ffordd wych o rannu ein sefyllfaoedd unigol a chael cyngor ac arweiniad personol.” Rhoddodd Diwrnod Rhwydweithio Ymchwilwyr gyfle gwerthfawr i ymchwilwyr a chyn-ymchwilwyr a ariannwyd gan WCRC ailgysylltu, cyfnewid syniadau a datblygu perthnasoedd a all gefnogi cydweithrediadau ymchwil yn y dyfodol. Diolch yn fawr iawn i’r holl siaradwyr, ymchwilwyr, Partneriaid Ymchwil PPI a hwyluswyr a gyfrannodd at y diwrnod, ac i dîm WCRC am drefnu’r digwyddiad. Ariennir WCRC gan Lywodraeth Cymru drwy Ymchwil Iechyd a Gofal Cymru, gan gefnogi ymchwil canser a chydweithio er mwyn gwella canlyniadau i bobl ledled Cymru….