Roedd Canolfan Ymchwil Canser Cymru (WCRC) wrth ei bodd yn cymryd rhan yn Eisteddfod Genedlaethol Cymru eleni fel rhan o stondin Prifysgol Caerdydd, gan roi cyfle i ymwelwyr ddysgu mwy am yr ymchwil canser sy’n cael ei chynnal ledled Cymru.
Drwy gydol y dydd, croesawodd tîm WCRC bobl o bob oed i’r stondin, lle cawsant gyfle i gymryd rhan mewn amrywiaeth o weithgareddau rhyngweithiol a gynlluniwyd i ysgogi sgyrsiau am wyddoniaeth ac ymchwil. Gwnaeth ymwelwyr freichledau DNA anifeiliaid lliwgar, archwilio rhith-wirionedd gan ddefnyddio ein gêm ‘ffrwydro canser’ a, yn bwysicaf oll, rhannu eu syniadau a’u gobeithion ar gyfer dyfodol ymchwil canser drwy addurno ein draig WCRC gyda’u syniadau.
Roedd y gweithgareddau’n gyfle gwych i siarad ag aelodau o’r cyhoedd am y rôl hanfodol y mae ymchwil yn ei chwarae wrth wella atal canser, diagnosis a thriniaeth. Cafodd y tîm nifer o sgyrsiau ysbrydoledig gyda phobl oedd yn awyddus i ddysgu mwy am yr ymchwil sy’n cael ei chynnal yng Nghymru ac i drafod yr hyn y gallai datblygiadau newydd yn y dyfodol ei olygu i gleifion a’u teuluoedd.
Mae digwyddiadau fel yr Eisteddfod Genedlaethol yn cynnig cyfle gwych i gysylltu â chymunedau ledled Cymru, ateb cwestiynau am ymchwil canser a rhoi cyfle gwych i ni ymarfer ein Cymraeg!
Diolch yn fawr i dîm Cyfathrebu ac Ymgysylltu Prifysgol Caerdydd am wahodd WCRC i fod yn rhan o stondin eleni, ac i bawb a ddaeth i’n gweld, cymryd rhan yn ein gweithgareddau a rhannu eu syniadau.
Diolch yn fawr – edrychwn ymlaen at ddychwelyd y flwyddyn nesaf!